ردد العبارة صفار ابو قشر الصديق الوفي لمنقار في الفترة الأخيرة وفي سنوات الكفاح..سأله منقار "وايه اللي حصل تاني ؟مش كفاية الإنفلونزا اللي اتسببوا فيها باهمالهم والاعتقال الجزافي ودم ابويا اللي راح هدر..ايه تاني ممكن يحصل يا صفار.. ايه؟ "
كان منقار في غاية الأسف والحسرة وقد ناهز من العمر أفرخه وشب عرفه وانتفض ريشه..وكان محط إعجاب كل فرخات الحي لأنه الشب الفرخي الأشهي وركا والأوسم عرفا والأغزر ريشا حتي انهم اسموه "تامر حسني " تيمنا بريشه الغزير وصدره القدير..
رد صفار علي منقار وقال له في غضب" مصيبة يا منقار مصيبة..عايزين يفتحوا محل اسمه وصاية..تخيل..ياكل من لحمنا الحي مش كفاية مؤمن اللي عاملنا بانيه وشيش ومورينا من الشوي ألوانه .عايزين يكملوا علينا بوصاية كمان "
ردد منقار"مافيش فايدة..مافيش فايدة"
رد عليه صفار"الجملة دي انا عارفها ..دي اللي رددها سعد باشا منقور بعد افتتاح اول سلسلة لكنتاكي واللي شردت أجدادنا كلنا وخلتهم حضارة"..
منقار" البشر دول عايزين منا ايه ..بيستلذوا بطعمنا بعد ما يربونا سنين وياكلوا بيضنا ويسلقوا ولادنا ..ومش مكفيهم ده لا وكمان بيستلذوا بطعمنا بكل الاشكال ..شوية شيش طاووق وشوية بانيه وشوية الاجريك..ده حرام واللهي حرام"
منقار" لأ والأفظع انهم هيتنافسوا بقي في العروض مؤمن يرخص يقوم وصاية يرخص واحنا اجدادنا بتندبح وده هيكون مصيرنا"..
منقار" لأ والأسم مخيف كمان ..وصاية تحس انهم هيربونا ويتوصوا كمان..زي ما بيقولوا في الأفلام ..فسحوووه"
صفار"تخيل انا قريت في جريدة الأعراف الرسمية ان في ناس في كنتاكي بتاكل العضم كمان..وحشية ما بعدها وحشية"
منقار" ده بيحطوا علينا كمان سائل احمر ملعون اسمه الكاتشب عشان يحسوا بعذابنا بيحسوا انه لون الدم ..البشر دول مرضي"
صفار"وولادنا مايزنيز ومسطردة"
منقار"كلااااااااب..انا مش هاسكت انا هاعرف اخد حقي"
صفار"وهتعمل ايه يعني ..هما مش بياكلونا احنا بس ده برضه المجتمع الحمامي بيشتكي جامد..وجراننا البط..ياراجل دول وصلوا انهم بياكلوا العصافير والجراد"
منقار في فزع" الجرااااد!!"
صفار"اه يا عم بيقولك بيتخلصوا منه في بعض المناطق فبيشووه وبياكلوه..ده غير طبعا الضفادع وساعات بيغشوا في المجازر وبيدبحوا حتي الحمار الغلبان ..مع انه طول السنة متعلق في الهوا وهو شايل الف انبوبة بوتاجاز"..
منقار" وحياة ابويا الغالي ما هاسكت لازم اعمل حاجة"
خرج منقار من المكان غاضبا وفجأة لعب القدر لعبته واصطدم منقار اثناء خروجه باجمل ورك ..ورك "فرخ" اجمل شابات المجتمع الكتاكيتي والتي لتستعمل ماسكرة ولا اي شادو ولا حتي روج اجو ..وكان جمالها الطبيعي شئ مش طبيعي..وبدأت معالم الهيام تدب في كل ملامح منقار برغم غضبه الجم وفزعه الأعم ولكنه عشق باقتدار وسرح في المنقار ..وكان الحب من أول نظرة..
وردد فجأة "وصاية وصاية وصاية"
سألته "فرخ" عن ما يقوله ..وكان الشئ المفزع..فجأة استيقظ منقار من ثباته العميق واحساسه الرقيق..ونظر في فزع الي الورقة المعلقة علي صدر "فرخ"
وسألها في فزع"يانهار اسود مين اللي معلق الورقة دي علي صدرك؟؟"
قالتله في خوف" ليه هي مكتوب عليها ايه خوفتني "
قال لها"قولي بسرعة مين علقها عليكي؟"
قالتله "صاحب العشة اللي جنبنا..ليه خضتني"
فجأة اخذ منقار فرخ معه في لهفة وقال لها"متخافيش انا مش هاسكت انا مش هاسكت"
عرف منقار السر ولكنه لم يريد ان يفزع "فرخ" عرف ان اصحاب وصاية رأوا انها عليها الدور للذبح لانها شهية ..وبدأت رحلة الهروب ..
انتظروا الجزء القادم "منقار في مجلس الشعب"
0 Responses to ديكو وفرخونة الجزء الرابع